Noag bou 'n ark

Die storie van Noag fassineer my al jare. Ek glo nie die hele wêreld het weggespoel nie – ek dink daardie idee moet anders benader word. Soos die ouens van Van Wyksdorp. In die middel van boggerol, 300 myl duskant fokkol, lê Van Wyksdorp. Swaai uit vir ‘n hoender en jy ry die dorp mis. Lank, lank gelede het die oudste en wysste dorpenaar van ‘n mekka genaamd Zoar vertel. 'n Toweragtige nirvana van wyn en violence, ag ek bedoel melk en heuning. Grootoog en eerbiedig het die jonger geslagte laataand by die geknetter van kampvure na die legende geluister. Mekaar se oë onderlangs gevang, saggies onder mekaar gefluister... wat as Zoar régtig bestaan??  Vuurwarm is hul ore dan deur ‘n effe ouer geslag geklap. Nee! Bogstories! Laster! Van Wyksdorp is verlede. Van Wyksdorp is toekoms. Van Wyksdorp is wêreld. Daar. Is. Net. Van Wyksdorp.

Ek glo dit was dieselfde met die sondvloed – ‘n groot gedeelte het verspoel, veel groter as die known grense van Noag en sy gesin se bestaan, maar nie die planeet nie. In elk geval, Bill Cosby het ‘n storie vertel waar God met Noag praat en hom opdrag gee om die ark te bou. Noag dink die hele besigheid is ‘n grap, maar op die ou end kom hy agter God is nie in die bui vir jokes nie – Hy is in die bui vir reën. Die inspirasie vir die woorde het daar ontstaan. Dit is in 2013  geskryf en neem baie verlief met ons pragtige taal. Dit is spesifiek op hoërskoolleerders gemik, maar ek het intussen uitgevind dat grootmense dit ook verstaan. Ek het nie al die instruksies bygevoeg nie, maar sonder enige verduidelikings is dit moeilik om die execution van die teks te kop.  Die storie is wonderlik en ek het dit met die grootste respek benader. So moet tog nou nie in jou ouma se pantie verstik nie - dis net weird.

Gebruik ‘n eg Kaapse Vlakte aksent, so oordrewe as moontlik.

Fingersnap X 4

Almal:      Voopa voopa voopa voopa X8           (Hou hiermee aan terwyl die volgende line begin)

                Noag bou ‘n ark – Ja! X4                   (Hou hiermee aan terwyl die volgende line begin)

                Noag kappityt – Ja! X4                      (Hou hiermee aan terwyl die volgende line begin)

                Spykers – Tieng! Tieng! X4               (Hou hiermee aan terwyl die volgende line begin)

                Planke vir die vale! X4

                Hy timmer, kap en hamer – da’ binne gaat dit woes

                Hy pass vir Sem die skroewe – die laaitie moet net koes
                Hy’t ‘n opdrag van die Jirre – Noag, jy moet BOU!
                Eks OP vir hierie mense – maar jys ‘n lekke ou.

                Die bure skiem die uncle is woes vertraag

                Want hy sny sy tjop met ‘n beitel en ‘n saag

                Die mense tune hom heeldag – hys die dorp se grootste grap

                Maar Noag dink net een ding:
Noag:     “Hmmmmm.

                Ek hoop ma’ djulle kan LANK water trap.” (almal tegelyk: hahahahahaha – sê dit so: ha-ha-ha-ha, baie monotonous)

Almal:      Hierie was ‘n boot van geweldige proporsies

                Noag was ‘n boer en hierie issie skorsies

                Hy werk hom in sy kas in, hy werk hom in sy maai

                Want die Jirre het belowe: die weer gat VINNIG draai!

Almal doodstil – wanneer spreker begin praat, skud julle julle koppe baie swaarmoedig. Arme Noag suffer iets verskrikliks en dit is amper te erg om oor te vertel:

(Spreker baie formeel, met ontsettend baie klem op artikulasie. Oordoen die uitspraak totaal en al):

Julle moet egter in gedagte hou dat Oom Noag drie seuns ook gehad het. Sem – die man wat vroeër vir die skroewe moes koes, asook sy twee broers: Gam en Jafet.

(Die volgende gedeelte moet jy vreeslik swaarmoedig oordra – rek die “ark van die jeug” baie uit, amper soos party predikers soms woorde soos kougom of ‘n nat sokkie kan uitrek):

Noag was egter al baie oud terwyl sy seuns die ark van die jeug op hul skouers gedra het. (Met die volgende gedeelte skud jy heeltyd jou kop, want ai, die tye is so swáár): Dit was moeilike tye sê ek vir julle, moeilike... (sug diep) ai... swaar man, swaar... mmmmmoeilike tye op daardie werf. Dit was hel... (BAIE klem op “hel” – dit rym nou-nou met “vetel”)

Almal: sug VERSKRIKLIK swaar – EEN sekonde max!! So make it count!!

Spreker:  Nou toe djulle ouens, lat ons vêde vetel:

               

                Almal:    Noag kyk vir Gam en raak net al hoe kwaaier

                Want Gam gebruik ‘n byl vir ‘n flippen skroewedraaier

Noag:     “Gam! Jou hoener! Hier kry ons nooit kla’!

                Wat de duiwel máák jy?? My senuwees trek swaa’!
                Jafet, Jafet, Jafet! Wat het jy daar beet??”
Jafet:      “Pa’s dam lekke stupid – dis iets om mee te meet!” (baie klem op die L van lekke – lllllllllllllllllllllekke)

Noag:     “Jafet! Jou klipkop! Jy moenie tippex rook  nie!

                Liniale bestaan nie – en sentimeters ook nie! “

Jafet:       Sorry Pa.

Noag:      Wie’s NOU stupid???

Almal:      Maar na maande se gesukkel en dit was omtrent ‘n stryd

                Toe stoot hulle daai boot by die driveway uit

                Ou maat, dit was ‘n storie – hieries immers nie ‘n skuitie

                Antie Noag, is da’ nie dalk ‘n koffie en beskuitie?
               
                Oplaas staan die boot in die pad gepark
                Noag tune sy seuns: 

Noag:     “Djinneeeee, dis dam ‘n dêm mooi aak!
                Nout die tyd gekom om die diertsjies te loep laai
                En djulle sal moet spark – my rug is in sy maai.”

Almal:     Hulle’t al daai massas diere in die ark gestop

               En toe ietsie gevat op...

(Almal doodstil)
(Iemand alleen, vreeslik fyn/dogtertjie-agtig, :

…hierdie fantasmagóriese werk wat Oom gedoen het. Ai Oom, (snik-snik), Oom is ouer assie berge en Oom jol somme’ deurie nag sodat ons hierie belofte kan survive.  Names die VLV, die AA, die rapportryers, die verenigde nasies, die FAK, Antjie Somers asook Mnr Uys wat die bus bestuur het: Cheers, Uncle! (Maak leë blikkies Coke oop)

Almal:    Tssssssssssssssss!!! Glug-Glug-Glug-Glug-Glug, Brrrrrrrrrrrrrrr!!!

Almal:     Da’ was donkies, koeie, beeste, skape, slange, miere, vlieë
               Niemand was alleen nie – van alles was daar twee
               Moo, miaau, woef, mê, kwaak, twiet-twiet

               Ou Noag kan ma’ van rus vegiet

               Onder in die boot was da’ ok twie varke

               Vir al hulle gemors kort zy eintlik twie arke

               Die leeus loer virrie bokke, die bokke virrie plante

               Ou Noag was in need van anti-depressante

               (Buite ritme):

Noag:     Maaaaammie, Maaaaammie, MAMMIE!! Gooi ‘n vodka, ‘n valium en ‘n tranquilizer

               My hart gaat sweerlik staan – ek soek my nebulizer

(Almal maak pootuit, hyggeluide – julle is nou MOEG gesukkel en gewerk. Gaan mal! Oordryf vreeslik! So vier sekondes is genoeg)

                Fingersnap X 4 – dit hou regdeur aan:
                Noag is nou moeg – Ja!                       (Hou hiermee aan terwyl die volgende line begin)
                Noag wil nou rus – Ja!                          (Hou hiermee aan terwyl die volgende line begin)
                Noag is nou gaar – Ja!                         (Hou hiermee aan terwyl die volgende line begin)
                Noag is gedaan – Ja!

Eindig fingersnap

Almal maak snork- en slaapgeluide en lyk ook of hulle slaap – hou vir so drie/vier sekondes hiermee aan. Oop bekke, agteroor koppe, koppe op die bors, kwyl as dit kan. Hou 8 tellings hiermee aan.

Almal:     Noag is totaal en al in sy kas!
               En toe slaat daar ‘n druppel teen ‘n venster vas!
               Noag ruk wakker, strompel uit sy kooi

               Trap eers op ‘n kiewiet –

(Almal doodstil)

Spreker:

Nei, my bgoe, djy trap my, djy makie mooi nie, my bgoe, ekt djou niks gemakie, djys onbeskóf, ek hettie hievoo opgesign nie, daai anne kiewiet kon djy ma’ buite galos het, hys ‘n rubbish, hy gat djou niks rent betalie, hys ‘n embarrassment ve die species, my bgoe. Gamors. Syp heeldag tewyl ekkie kjênnirs moet was en moet stryk en moet kook vir sy permanent leë pens. En ek is djou goedgesind, my bgoe?? Ênnieway, ek pgaat te viel, over to you!! (op “over to you”, kyk jy vir die koor en wys na hulle – onthou dat “bgoe” met” you” rym, so jy moet baie klem hierop plaas)

                Noag:     “Gam, maak toe die deure - hie kom ‘n sikloon!
                                Maar die Jirre het beloewe Hy sal ons beloon
                                Roer djou! Hie kommit! Hierie bui is wyd verspreid!
                                Hy spoel vandag die grond onder ons gatte uit!”

                Gam:      ”Jaaaaaaa Pa, reeeeeeeg Pa, ma’ ek wil nog bietjie lê” (Rek julle rustig uit, gaap, lyk baie lui)
                Noag:     ”Gam, jy soek my! Doen net wat ek sê!
                                Sit ‘n bietjie spoed in jou slap lyf!

                                Ek bid en hoop net hierie blooming boot sal dryf...”

FingersnapX4
Begin baie sag en gaan al hoe harder totdat ALMAL CHAOS uitgil!!

                Drup X16                                             (hou aan tot net voor CHAOS!!!)

                Tippe-tippe X8                                     (hou aan tot net voor CHAOS!!!)
                Af kom die reën – Ja! X4                     (hou aan tot net voor CHAOS!!!)
                Alles spoel weg – Ja! X4                     (hou aan tot net voor CHAOS!!!)
                Spoedig oorvloedig! X4                       (hou aan tot net voor CHAOS!!!)

                Water vir die vale! X8 (hier bou julle die volume – elke keer harder as die vorige keer)

                CHAOS!!!!!!!!!!!!!! (ALMAL  GIL dit uit , so hard as julle kan! Die mense op die maan moet julle kan hoor!)

Almal doodstil....
Almal begin saggies dog hoorbaar

                Die ark vaar nou in stilte

                Dis in die binnebaan

                Op ‘n oseaan van stilte

                ‘n Stille oseaan

                Hier vaar hul vas in Moses

                Hy maak vir Noag boos:
               

                Moses:  “Julle neuk na die weste

                               Die oewer lê mos oos!”

                Almal:     Moses, jys oraait ma’ hiers directions en pamflette

                               Ons soek vir ‘n berg - loop soek jou kliptablette

                Almal:     Gam raak  alweer moeilik

                               Hy gedra hom soos Gammat

                Gam:     “Ek roei my voos na nêrens;

                               Ek roei my boudjies plat.”

                Noag (op die bekende deuntjie):
                               “Fine Gam, hiers ‘n plan
                                Stuur tog net ‘n flippen kraai!”

                                Ma’ daai kraai was ‘n witborskraai

                                En sny toe koek na Mosselbaai (wys met julle hande in die rigting van Mosselbaai)

                Almal:      Nou moet Noag mooi skiem – die diere raak opstandig

                                Die Antie ignore hom – die besluit is dus verstandig (let op!! – die line moet DADELIK na die volgende vloei!)
                                om vir duifie uit te stuur om vir oewers te gaan tuur

                                En terug te kom met good news, want almal is goed GAT.... ons bedoel “suur”

                                Duifie, duifie, duifie – die Jirre kies jóú vlerke
                                (Kiewiet was geen option - selfs kiewiet het haar perke)

                                Sy kom terug met ‘n takkie, sy kom terug met ‘n lat

                                En die ark gooi anker op soliede Ararat.

                                Hos.